噚日父親節全日落住雨，但無阻一班爸爸級股評人的親子樂，淨係收到仔女親手做嘅手工，已經夠開心。富昌譚朗蔚（Stevan）一家四口到迪士尼玩，順便慶祝4歲大仔生日，仲收到仔仔畫嘅心意卡，畫工雖然抽象，不過喺爸爸眼中最無價，Stevan形容係「藝術情操好高」。
至於騰祺基金嘅沈慶洪（Patrick）一家人噚晚食中餐慶祝，6歲仔仔創意搭夠，用手掌印整咗張怪獸卡，一句「daddy's little monster」，冧爆爸爸。
招銀國際蘇沛豐（Daniel）個女得歲半，未識對爸爸有表示，但Daniel趁天晴一刻即帶囡囡落街玩，一樣開心。
至於兩個乖女已經出晒身嘅股壇「開心果」藺常念（藺Sir）就有口福，一連兩日「食好西」，周六晚先同細女食意大利私房菜，噚日中午就到大女請食日本菜，藺Sir學埋後生仔嗰套「相機食先」，再po食物相上fb分享，見到都流口水。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk