為咗打籃球，你可以去到幾盡？為咗幫人打籃球，你又可以去到幾盡？平時約fd打波唔係咁易「湊夠腳」，皆因有人、有波仲要有場，尤其是香港「土地問題」咁嚴重，以下呢個故事可能啟發到大家，首先你要…有呢位熱心人咁窩心！
美國媒體《SBNATION》專欄作家Whitney Medworth周五分享以下一段經歷，話說佢喺下塌酒店對外停車場聽到小朋友吵鬧聲音，於是探頭望出窗外，見到一班小朋友喺貨櫃隔籬打籃球…冇籃又點打籃球？原來呢班小朋友統統都係一隊名為2003 Mississauga North Tigers嘅棒球隊成員，周末嚟到俄亥俄州參賽，平日仲會踩過界打籃球、曲棍球等，今次嚟到附近「手痕」想開波，於是喺貨櫃上面mark個紅色交叉當籃就算數，點知呢個時候有位名為Nick嘅陌生男子路過，自動請纓俯伏喺貨櫃頂、雙手圍成一個圓圈當籃框，就算幾分鐘已經俾籃球掟中十幾次依然扮足兩個鐘，為小朋友帶來無窮歡樂！