消防局趁住回歸20周年嚟個裝備大晒冷，睇吓咁多年來嘅演變。裝備之中最打得當然係2011年引入嘅「黃金戰衣」，頂得住成千度嘅高溫達8秒，喺分秒必爭嘅火場絕對唔少得。但舊年嘅牛頭角迷你倉大火，就疑似因為件戰衣太焗，唔少前線消防員因為缺水或者熱衰竭昏迷送院。
八方問署任高級消防區長（採購及物流）劉國富，會唔會改良吓件戰衣，佢就承認有手足反映過，着住戰衣出入火場有過熱壓力，但佢又即刻帶番頭盔話「咁係咪同黃金戰衣有直接關係呢？係睇唔到嘅」。佢話𠵱家做緊恒常嘅裝備檢討，會同生產商研究有冇更好嘅物料。
除咗裝備，消防局舊年開始都完善咗火場嘅休息區，有冷氣之餘亦會準備朱古力、餅乾同杯麵畀消防員唞一唞再衝鋒陷陣。
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily