全港最大嘅公立醫院醫生組織——公共醫療醫生協會，前晚舉行晚宴，前會長吳志豪正式卸任，由北區醫院泌尿科副顧問醫生麥肇敬接棒，食衞局長高永文、醫管局主席梁智仁等都嚟祝賀。
做兩年投行後再讀醫
麥醫生當然受歡迎，但另一位女神都好有人氣，講緊嘅係啱啱成為前線醫生聯盟（FDU）史上首位女主席嘅黃嘉恩醫生（Catherine，圖）。
Catherine呢幾年喺東區醫院婦產科工作，佢同八方講當年佢會考拎到八優，揀咗「拔尖」入科技大學讀環球商業管理課程㗎，畢咗業仲喺投資銀行做咗兩年。點解放棄高薪厚祿呢？佢話雖然應付到投行無盡「跑數」嘅壓力，但始終覺得自己唔慣淨係向錢看，就把心一橫去中大讀醫科，立志成為婦產科醫生。
Catherine話作為FDU主席，最希望醫科畢業生年年都全數獲聘，如果政府日後增加有限度註冊醫生，令本地醫生冇工開，一定唔會放過政府。佢亦提到，今年有好多關於醫療事故或者投訴嘅報道，或多或少影響年輕醫生士氣，希望自己或者工會可以紓解前線情緒。當晚Catherine以一襲黃色晚裝赴會，落落大方，八方問佢係咪追求者眾？佢笑住話：「零！」
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily