唔怕大肚女友呷醋?騎師李寶利又呵又氹另一目標!

唔怕大肚女友呷醋?
騎師李寶利又呵又氹另一目標!

近期旺爆已連贏4次賽事的意大利籍騎師李寶利,於這天(16日)沙田馬場晨課,又有搏殺動靜出現。

話說李寶利今朝親試周日(19日)第七場三班1650米泥地的「旅遊首席」,人馬在泥地大跑道跳兩段800米,走來輕身有勁。
廐主葉楚航在烽火台內吼實該駒走勢,而操完返機坪落馬後,李寶利親自替馬兒解開脷帶,之後馬房人員捉住李寶利傾一大輪,又拍晒李寶利膊頭,似叫他要俾心機騎此馬。
之後馬房人員離開,李寶利仍未走繼續睇馬,並上前連番撫摸馬頭,洋溢寵愛之情,口中亦念念有詞,對馬兒作出鼓勵。
「旅遊首席」泥地一哩演出特別出色,至今所獲兩場頭馬俱在此程取得,上仗表現較差,純因排檔欠佳,小將巫顯東發揮亦未盡理想。
今次換上李寶利,當然不同級數,加上抽到5檔遠勝上仗,難怪李寶利今朝咁有心機操「旅遊首席」,對牠又呵又氹了,唔知其大肚未婚妻Kimberley會否呷醋呢?