香港人苦等咗5年，終於等到特首梁振英卸任，繼前排梁粉幫梁特首搞嘅歡送會，噚日立法會亦喺宴會廳搞番場餞別梁特嘅午宴，民主派全面缺席就不在話下，最慘係連主角似乎都唔係就快卸任嘅梁特，無端端變咗食物及衞生局局長高永文生日會，呢啲係咪叫做人走茶涼呢？
買蛋糕賀登六
噚日嗰餐飯，成個非建制陣營得社民連梁國雄一個有報名話去，但最後毛哥都係現唔到身，剩低清一色係建制派。大家咪以為得番建制派，梁特就可以威威，八方聽聞成餐飯最多人談論嘅係表明唔撈嘅食物及衞生局局長高永文，同埋盛傳順利過渡嘅政務司司長張建宗。
點解咁多人講民望高呢？原來咁啱噚日係佢60歲生日，所謂生日大過天，民建聯元秋蔣麗芸知道後立即炮製驚喜，派人買咗個蛋糕同民望高賀壽，𠱁到民望高不知幾開心。據聞席間有人見民望高都離開官場，加上民望夠高，叫佢不如試吓立法會嘅九龍西補選，民望高一聽見即刻耍手擰頭話「唔好玩我啦！」果然係有智慧嘅回應。
至於張建宗就食飯不忘工作，同佢同枱嘅經民聯梁美芬話，張建宗真係好勤力，「一日個餸未嚟，佢都喺度寫筆記」，結果梁美芬都忍唔住嚟個靚抽，同張建宗講唔可以用司長標準，嚟講標準工時囉！張建宗聽到後，講笑話自己公私分明，知道自己要為人着想，叫打工仔唔好搵佢做榜樣喎。有建制派議員透露，張建宗話可以咁專心工作，係全因老婆成日煲湯畀佢飲，仲陪佢一齊唔放假㖭。
李八方
2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily