車路士、熱刺、曼城、利物浦、阿仙奴、曼聯…邊個話英超得「big 6」？愛華頓就唔係咁諗！繼周四以3,000萬鎊（約3億港元）轉會費由新特蘭收購23歲英格蘭門將比克福特，愛華頓同日以2,700萬鎊（約2.35億港元）落實由阿積士收購荷蘭國腳中場卡拉臣，單日豪燒5.35億港紙，向列強宣戰！
24歲嘅卡拉臣早喺2011年獲擢升阿積士一隊，為球隊上陣163場射入49球，過去兩季更成為隊長，領軍3奪荷甲之餘，去季亦協助球隊殺入歐霸盃決賽僅負曼聯屈居亞軍。同「拖肥」簽約5年至2022年夏天嘅卡拉臣表示：「當我直接同領隊（朗奴高文）交流時感覺良好，佢係一個坦誠嘅人，我哋談論球會前程、足球理念等，令我留下深刻印象。離開阿積士相當困難，但我認為自己踏出好嘅一步，相當期待新一章。」
英國傳媒更報稱，愛華頓收購行動陸續有來，對象包括馬拉加前鋒辛度拉美利斯、AC米蘭前鋒麥巴耶尼安，以至般尼後衛米高堅尼等，如果上述幾單deal全部成事，「拖肥」新球季絕對值得期待！