昨晚（14日）谷草之戰堪稱華將之夜，事關全晚八場賽事中，有五場嘅勝仗都降臨喺華人騎師身上。
唔單止兩位新晉見習生繼續強勢有馬贏，最威當然要數巫顯東起孖兼升格埋做七磅仔；另外風頭躉火車潘潘明輝亦繼續大開殺戒，出道有九戰例有馬贏。
最感動嘅係就連成績低迷嘅吳嘉晉，以及因傷患搞到20個月都未開到齋嘅賴維銘，佢哋兩個都有份喺呢晚分一杯羹，吳嘉晉亦都取得累積第70W，而升格為三磅佬，真係可喜可賀。
近戰咁多牌仔都升晒呢，睇睇嗰成績表，原來有位小將都差兩場頭馬，就升呢成為五磅仔，意味佢之後出賽只可減五磅，而呢位仁兄就係現年24歲嘅黃皓楠，佢現時累積在港43W。
呢位隸屬徐雨石馬房嘅見習生喺周日（18日）之戰就有四匹座騎，其中最有勝出機會者，莫過於出戰第9場二班1600米賽事嘅「小米周」。
呢匹沈集成馬房賽駒今季只獲一W，其後一直走勢浮浮沉沉，而今仗嘅評分終降至季初贏馬附近水平，更抽得對前速馬利好嘅3檔，只要皓楠仔早段留放得宜，贏呢場其實唔難。