吳綺莉同韓君婷噚日喺銅鑼灣出席NuMe美容活動，提到囡囡卓林情況，吳綺莉話：「一路有醫生、社工幫手，係我自己唔好，忽略咗佢嘅感受，單親家庭，有啲嘢我頂得順，唔代表佢頂得順，我虧欠咗佢，爆咗煲，感恩好多人幫手。」
「唔想做婆婆」
講到囡囡自殘，吳綺莉話：「佢𠵱家有食藥，佢身體唔舒服，唔可以怪佢。」問到卓林同網紅密友A小姐嘅關係，係咪兩母女嗌交嘅導火線？吳綺莉話：「冰封三尺非一日之寒，好多嘢唔可以全部怪人，好多時忽略咗個女嘅感受，我有同佢講對唔住，所以我要做好自己。」仲話會積極工作，已經戒酒。
再追問卓林係咪同A小姐拍拖？吳綺莉話：「係朋友，17歲，摸索緊，唔知自己係點，17歲拍拖都未必係嗰個，冇得逼。」問佢介唔介意囡囡同性戀？佢話：「我好開通嘅，冇乜所謂，反而介意佢返嚟話畀我聽有咗，我唔想做婆婆，性別唔重要，搵個伴要照顧、了解大家、心地善良，錫我個女比任何嘢更重要。」
撰文：馮仁昭