恒大（3333）股東會向來好快完場，小股東關心現場點心，多過同管理層交心，但自從呢半年獲北水照料，股價爆上之後，噚日連股東會氣氛都唔同晒，現場近百個座位坐滿，又罕有地有十幾名中港股東爭住提問，有位操普通話嘅小股東仲好恨見主席許家印，咋晒型話，由上市至今揸足8年，只見得許家印兩次呀！
恒大股東會由首席財務官潘大榮與執董黃賢貴幾位高層主持，但小股東投訴話「大的都不出來」，黃賢貴想打圓場指「許主席、夏總裁（副主席兼總裁夏海鈞）都在北京出差」，小股東反問：「不會都那麼湊巧吧」（佢哋都幾叻喎）。
難得黃賢貴耐心解釋，指公司近年發展得快，可能有啲事大家唔理解，但會幫手轉達畀許主席知大家想見佢。誰不知，但呢位小股東未夠喉，繼續發炮嫌恒大香港總部恒大中心（前稱美國萬通大廈）外牆顏色唔好，話由尖沙咀望過嚟根本睇唔到。
黃賢貴即刻讚對方好提議，自爆公司跟樓頂廣告客戶三星傾過，想對方提前轉讓個位畀恒大，但對方堅持，惟有等到2019年3月完約先可以將廣告牌收番喇。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk