日本人對賽馬嘅熾熱程度，用兩個字嚟形容就最啱，就係瘋狂。香港馬迷就算點用車輪鞭狂騎，起碼都仲要輸幾個馬位，點解咁講？
日本中央競馬會公佈早前喺東京競馬場舉行嘅日本打吡（三歲一級賽2400米），就癲到有成4,090位日本馬迷，於場外通宵排隊等入場。
當中排頭位的仁兄，據知早於8日前就已經出現，最終埋單就有近8,400名馬迷，為坐靚位睇打吡而通宵排隊，相反香港就從未出現過呢類咁瘋狂嘅排長龍睇跑馬的場面。
其實東京競馬場可容納223,000名觀眾；而沙田馬場最多都係得85,000人，入場人數多兩倍既關係，所以日本跑親大賽嘅氣氛都比香港正好多。
日本賽馬氣氛咁濃厚，除咗因為日本有越搞越大嘅育馬事業外，其實當地馬會推行嘅政策都功不可沒。唔同香港，佢哋會喺賽馬日開放中間嘅公園大搞嘉年華，又可以俾未成年人士進入馬場，仲會力邀當紅嘅日本藝人拍廣告，上年打吡宣傳片就見到有村架純有份演出。
日本咁做就慢慢令賽馬俾人嘅印象，唔再係一個拋妻棄子、烏煙瘴氣，只有爛賭仔先會去嘅地方；而係有一個有活力、正氣，啱晒一家大細一齊聯誼嘅活動，其實香港馬會想繼續發展，日本賽馬嘅營運同推廣模式真係值得借鏡。