即將登六（60歲）嘅食物及衞生局局長高永文，噚日正式宣佈唔會留任下屆政府。高永文話，如果特首梁振英留任，佢會考慮留任多啲；但唔留任有好多原因，包括自己一直比較喜歡臨床工作。雖然自己同CY關係較深厚，但佢多次否認同候任特首林鄭月娥不和，仲讚林鄭非常能幹，有抱負，肯聽下屬意見。
高永文有民望高之稱，佢話相信因自己主責民生議題，對唔同政治光譜嘅議員都對事多過對人。
民望高任內推銷政改時，對住個阿伯好激動咁話：「講完！」成為經典，佢話係自己情緒表達最失控嘅一次，因為當時俾人話佢呃細路，觸動佢核心價植；雖然冇後悔咁講，但係過去5年都訓練咗佢嘅EQ。
有傳民望高已經喺佐敦搵咗舖位再開診所，佢唔肯多講；但承認放低把手術刀5年，要惡補番最新技術。回顧自己任內政績，佢話自己唔係功成身退，好似公立醫院輪候時間長嘅問題，仍然未解決，希望10至20年公私營醫療市場先會相對較平衡。對於經常發生醫療事故，有醫生批評同人手有關，佢話對於唔可以即時改變情況，有少少失落。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk