唔叫普巴（Paul Pogba），唔叫博格巴，展開中國同香港之旅嘅曼聯法國中場保羅普巴，話要叫自己做「波霸」。普巴日前喺佢社交網站度放相，show佢個新髮型，後腦位置鏟咗「波霸」兩個中文字喺度兼染埋藍色，仲留言話「嚟緊！」，後面就係支中國國旗符號。普巴其中一個外號叫做「POGBOOM」，直譯叫波霸都唔錯喎。
球季結束，國際賽都踢埋，普巴都仲未可以正式放假，一連幾日為贊助商「三間牌」進行商業活動，地點有幾個中國城市，同埋會親臨香港，喺下周一嚟到尖沙咀同球迷近距離接觸。
連迪路夫3.1億成紅魔最貴後衞
另外，曼聯喺周四落實今夏第一簽，以3,075萬鎊（約3.1億港元）轉會費，由賓菲加收購瑞典守將域陀連迪路夫，超越咗喺02年以2,910萬鎊加盟嘅里奧費迪南成為曼聯隊史最貴後衞。呢位瑞典中堅綽號叫「冰人」，除咗最擅長嘅中堅位置之外，亦可以擔任右後衞同中場位置，認真全能。至於佢兒時嘅足球偶像，係新東家曼聯死對頭、前利物浦中場謝拉特。紅魔又多個人爭中堅位，其中菲爾鍾斯就話未驚過，話有競爭就有進步。
紅魔加強防線，外國莊家都幾睇好佢哋喺下季可以重奪英超冠軍。威廉希爾博彩公司嘅最新17/18球季英超奪標賠率（見附表），曼城仍然係大熱得3倍，次熱係衞冕嘅車路士有4倍，曼聯就以4.5倍排第三，之後第四位嘅熱刺已經係9倍，反映外界普遍睇好下季英超係雙曼一車之爭。
史篤城都嫌棄「月巴」
相信連迪路夫只係曼聯今夏增兵嘅第一步，話晒下季重返歐聯，梗係要再人強馬壯啲。不過或者有位球員係紅魔唔想留嘅，佢就係高薪包袱、下季繼續收25萬鎊（約250萬港元）嘅朗尼，由於喺周二突然有博彩公司將佢轉投史篤城嘅賠率，由23倍升溫到9倍，似乎離隊機會好大，不過傳媒披露一位冇透露姓名嘅史篤城內部職員就話，球會根本冇考慮過要簽朗尼。
