不時有火爆言論嘅民記議員蔣麗芸元秋，噚日喺立法會提動議，要求政府用1,000億公帑成立嬰兒基金，增加巿民生育誘因前，又主動會見記者，其間一度不滿政府用2,000億元成立未來基金，卻未有如新加坡政府咁為下一代着想，激動拍枱話：「基你個頭啦！你不如攞番1,000億，撥番畀我哋啲小朋友！」仲話自己見識多過班官員，叫佢哋不如請教佢搞嬰兒基金。
「我哋要do something！」
元秋話，政府如果覺得唔可行，佢願意同官員公開辯論，霸氣話：「靠佢哋班人（政府官員）咁諗，你不如問我Ann姐！老實講，我見識比你多，係咪先？我自己走南闖北，我做生意，我一路見嘢比你多！」自爆由於近日頻頻到深水埗視察，所以感受到貧窮家庭痛苦，講講吓仲出埋英文:「我感到吖嘛！既然係咁，do something！Right？我覺得我哋要do something！It's time to do it!」
元秋咁上心，可惜現屆政府反應一般，勞福局長蕭偉強話覺得政府現有政策較有針對性，樂意就如何完善「現有措施」同議員溝通。泛民同建制派議員對建議唔多受落，最終元秋動議只獲12票支持、23票反對，未獲通過。不過噚日做完呢個辯論後，元秋話會再以「為孩子帶來一個希望」名義，入紙排隊再動議，認為咁好嘅建議，冇可能唔做，透露早前見候任特首林鄭時，都反映過上述訴求覺得奶媽願意考慮做喎。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk