嚟緊禮拜日(18日)沙田日馬，並無任何大賽上演，最強戲碼只係得兩場二班賽，不過其中二班田草1200米都算有睇頭，單係「喜悅繽紛」、「海翡翠」、「獅子驄」三駒，季內已合共取得14場頭馬，到臨唞暑佢哋又再上陣，究竟呢三隻馬可延續佳績，抑或已係強弩之末呢？
其中「喜悅繽紛」5捷後不但試過大閘勝出，今仗還續雷神莫雷拉，估計一定受到熱捧。但其實呢場絕非上述三駒玩晒，有隻後起之秀，隨時將上述三大多捷馬一網成擒，就係賀賢馬房「小巨人」。
話說四歲的「小巨人」上仗在港初出，於三班田草1200米，只係擊敗實力非太強之「綠勇士」，但要留意當日「小巨人」沿途守第三位下，直路一望空即自動脫穎而出，潘頓不斷向後望，既冇落過鞭，亦無大力催策，扣實座騎已行過對手，就此贏1.75馬位，姿態猶如晨操般，質素隨時超對手兩班，認真得人驚。
「小巨人」連同外國兩戰1300、1400米，換句話說歷來共3仗全勝，而為咗迎接周日初上二班之戰，「小巨人」亦好有誠意，上周特意由潘頓親自試一課大閘，結果走勢強勁勝出。相比起「喜悅繽紛」，「小巨人」不但跑得少體力佔優，而且受讓「喜悅繽紛」10磅，可能就係勝負關鍵。