成功喺7.1搶佔維園搞慶回歸活動嘅香港各界慶典委員會噚日舉行宣傳車啟動禮，宣佈會舉行530多個活動，身為慶委會召集人嘅鄭耀棠好hard sell，佢話市民如果想知第一個將人造衞星發射上天空嘅係邊個國家，以及想知機械人同真人打羽毛球邊個會贏，本月29至7月2日可以去維園參觀，毋須入場券㖭。
棠哥仲企喺紙板太空人前，套上自己嘅樣扮太空人瞓身宣傳，但因為紙板太空人太細粒，佢要稍稍踎低先就到位，自嘆年紀大，踎咗陣都好攰要唞唞。八方現場所見，宣傳車播出機械人宣傳片時，條片突然lag機又起格，莫非段片太高科技，一般器材都播唔到？原本要派宣傳單張嘅棠哥，最終留咗唔夠半粒鐘就以有約為由走人，其他慶委會成員派咗約5分鐘亦散band。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk