英格蘭喺星期日拎咗史上首個世青盃，相信唔少人都知道，但喺過去嘅周末，其實英軍唔單止捧咗一個盃。除咗U20隊稱霸世界外，佢哋嘅U21亦喺上周六擊敗科特迪瓦，連續兩屆拎咗土倫盃冠軍。
U20同U21齊齊報捷捧盃，睇嚟英格蘭前途充滿希望咁喎，加埋成日都有人話美斯、阿古路、保羅普巴都拎過世青盃金球獎㗎，呢次蘇蘭基（圖）仲唔掂！小弟都寫過唔少稿講歷屆世青盃出過乜球星，基本上每屆都要寫一次，寫到世青盃踢得好的話大個就一定掂咁。其實，喺世青盃踢得好嘅小將，大個咗做到頂級球星嘅只係鳳毛麟角，大部份嘅結果可能係泯滅眾人。就算踢得好到拎埋世青盃金球獎，大個咗成才嘅機會率都係一半半。
上屆世青盃金球獎得主係艾達馬查奧爾，佢之後俾摩納哥收購，但上唔到位，上季外借到葡超嘅里奧艾維，唔見得佢有幾勁。2011年嗰屆世青金球得主係巴西嘅漢歷基艾美達，世青盃已經係佢職業生涯頂峯，佢連巴西大國腳都未踢過，一直喺國內聯賽流浪。其實新星同球星之間嘅鴻溝比大家想像中大，「小時了了、大未必佳」先至係常態。世青盃成名後，佢哋仲需要好嘅教練、前輩球員、訓練設施同埋實戰比賽等嘅配合，先至有機會可以成為下一個美斯或者普巴。
不過，英超咩環境大家好清楚，球隊願唔願意畀呢班英格蘭小將上陣機會呢？特別係一班爭緊歐聯資格同埋冠軍嘅豪門，佢哋願唔願意去畀機會呢班小將從錯誤中學習呢？蘇蘭基由車路士跳去利物浦，講真分別唔大，只係由原本同夏薩特爭正選，變為同菲臘比古天奴競爭。
文：咖喱