熱血公民立法會議員鄭松泰近日喺內部會議嘅錄音曝光，被揭發話要同青年新政梁頌恆、游蕙禎「扮friend」，因為「大眾白癡」，以為熱血公民係本土派，其間仲提到去年已同選舉盟友、網台MyRadio創辦人黃毓民「溝通唔到」，話對方「掂到我底線」，呢句話辣㷫教主開拖還擊，日前喺網台節目斥泰博等人係「人渣」、「講大話」，仲質疑「熱血時報」早前眾籌設「熱狗仔隊」，獲佢嘅老友捐逾20萬但至今未見影。
泰博喺流出嘅錄音中批評毓民創辦嘅MyRadio，突然暫停由「熱血時報」負責人黃洋達主持嘅網台節目《大香港早晨》，「掂到」佢底線，令佢覺得唔可以同毓民溝通。毓民就反駁泰博話對方「講大話」，「X你老味捩橫折曲，底線？乜X嘢底線啊你嗰條？咩紅線啊？你咁X巴閉？」
質疑眾籌設熱狗隊冇運作
毓民又質疑「熱血時報」早前公開募捐，成立「熱狗仔隊」，但收款後唔見狗仔隊運作，「我啲老友係咁課金畀你，X你老母回水㖭啊，人哋𠵱家追你，狗仔隊喺邊啊？畀X咗廿幾萬你，有晒收條喺度㗎」，其後反問皇上同泰博等人，「我有咩對你哋唔住啊？除咗我老糊塗信錯你之外，有咩對你唔住啊？」仲話自己敗選係上天眷顧，「呢班真係人渣嚟……選輸呢上天對我就非常之眷顧，（佢哋）露X晒（真面目）出嚟」。
對於泰博不滿毓民喺網台節目中，將組織圍內互相封鎖嘅內部恩怨，同選舉盟友、城邦論倡議者陳雲所提倡的清算本民前支持者、「清算偽毒派」等具「公共性」話題扣連，毓民都有駁斥：「我反對清算，一早話畀你聽㗎啦，清乜X嘢算啊？清乜X嘢黨啊？大家政見唔同、諗嘅嘢唔同，咪bye bye囉，好X簡單之嘛，啱唔啱啊？」
泰博曾經話，「沒有黃毓民，我們甚麼都不是」，呢鋪師徒決裂，江湖以後係咪會好多事？唔少政界中人剝住花生睇戲，仲提出一個問題：教主同戰友反目，係咪一個永恒定理呢？
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk