女神收兵嗰陣，會不斷畀暗示隻兵仔，等兵仔以為有機會升上做將軍；假如當女神想拋棄隻兵仔嗰陣，可能只會講一句「你誤會咗」！基沙文嘅個案有啲似。點解基沙文唔去曼聯，啲魔迷會咁失望呀？就係基沙文不斷放風話自己想走，想過檔曼聯，畀咗份假希望曼聯球迷。點知佢一個屈尾十話要留隊，基沙文家陣就話大家誤解咗佢嘅意思。
基沙文堅係講過，去曼聯嘅機會有六成，同埋自己準備好離隊，但佢同馬德里體育會續約後就轉晒口風，好似將自己講過嘅嘢全部唔算數。呢位法國射手話：「首先我要向嗰啲誤會我諗法嘅人道歉。可能我表達得唔好，或者有人想造新聞，但根本冇嘢發生。」可憐嘅魔迷，幻想咗基沙文加盟咁耐，但如今基沙文只係用咗一句誤會咗去解釋。基沙文繼續向馬體會效忠，「由加盟馬體會開始，我為球會、隊友同埋教練團隊而付出所有。為咗多謝球迷支持，我會喺場上踢出最好表現。家陣我會休息一排，之後就會去同隊友、教練會合，準備新球季，就好似每季開始咁一樣。」