今晚（14日）谷草頭兩場賽果單睇冧巴，以為係影印機複印咁，須知第二場四班一哩與頭場同班同程，都由2檔9號馬勝出，第二場跑出見習騎師巫顯東座騎「心中有善」（葉楚航馬房），單Win及組合獨贏A2分別派33及24.5元。
呢場賽事末段鬥得好精采，巫顯東策前置的「心中有善」，臨尾兩步力拒郭能座騎後上馬「明月光」的挑戰，兩駒近乎平頭，結果「心中有善」影相險勝一條線；「明月光」僅輸做做二奶。雷神操刀的「常妙星」中段發力透出後，埋門捱唔住得第三，只負短馬頭位。第四名由女歌手JW男友葉韋彤名下馬「一支梅」拎到，四重彩派二萬八千幾。
頭場由1至4檔馬構成四重彩，第二場亦幾乎係咁，2檔「心中有善」、4檔「明月光」、7檔「常妙星」及1檔「一支梅」順序跑入前四名，反映今晚早段內檔馬優勢極之明顯。
葉楚航表示巫顯東策「心中有善」跑得非常醒目，一直頂住及咬實給莫雷拉坐騎「常妙星」，沒有給「常妙星」彈甩，否則「心中有善」一定會輸。而今場賽後有位青春版Jessica C.拉頭馬，大露美腿，十分搶鏡。
23歲巫顯東毫無疑問係近期風頭最勁見習騎師，本身已連勝四次賽事，風頭不遜另一牌仔潘明輝。