關愛基金呢壇扶貧基金，喺2010年社會一片仇富聲音中由前特首曾蔭權宣佈成立，煲呔當年話政府同商界各出資50億元，合共100億，協助綜援計劃幫唔到嘅項目，交由前政務司長唐英年打骰，外界一致認定係唐唐嘅「競選基金」，為表忠誠嘅商界確實一呼百應，但埋單計數課金最多嘅竟然係你同我噃。
689上場 捐款遞減
當年挺唐大將李嘉誠認捐5億，四叔又話捐4億、郭氏兄弟又話捐4億，短短兩日成班有錢佬應承捐35億，但政府近日向立會交代關愛基金籌款情況可見，2011年只籌到3億，之後一年特首選舉最勁有近5億，但689上場後捐款情況每下愈況，到2015/16年捐款跌至104萬，2016/17年僅7.2萬，今個財政年度開始咗兩個月只有2.7萬咋。
可能基金「唐味」濃，又或者預計到大孖沙冇乜向梁班子捐錢嘅意欲，林鄭2012年底時任政務司長時公開話過政府暫時唔會主動呼籲商界再捐款，唔知佢登基後點處理呢個基金？但埋單7年計，基金籌到18億，同富豪最終承諾嘅35億好有距離。咁邊個富豪捐得最多？誠哥定四叔？答案係納稅人，基金前後向立法會申請200億元注資額，最關愛港人嘅就係香港人自己，畀啲掌聲自己！
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk