華人騎師這晚（14日）谷草認真爭氣兼醒神，第七場二班1800米，輪到27歲的吳嘉晉贏馬，佢騎師傅告東尼旗下落飛馬「馬克羅斯」一放到底，勝出個人今季第三場頭馬，單Win及組合獨贏A2分別派77及29元。
吳嘉晉現時身份係自由身騎師，佢在港剛好贏滿70場頭馬，正式由周日（18日）沙田日賽開始由受讓五磅轉為受讓三磅。截至此場這晚華人騎師已有巫顯東(起孖)、賴維銘、潘明輝及吳嘉晉四人贏馬，共取五Win。
講番現年四歲的英國自購馬「馬克羅斯」，由大馬主蕭百君細仔蕭劍新持有，今季以85分在港出道，天生栗色一副靚仔樣，本身於外地九戰五冠一亞一季一殿，包括兩勝一哩表列賽，戰績非常突出。
「馬克羅斯」來港後曾於田草及谷草1200米各跑過一次第三，近排逐次增程，卒之今晚加程首戰1800米，復配之前騎過的吳嘉晉負109磅排第2檔，由起步到衝線都係最先一駒。
「馬克羅斯」大勝2.5馬位，打開本身在港勝門，造出1分47秒61超快時間，打破了本年3月22日「萬馬飛騰」的1分48秒05舊紀錄，刷新谷草1800米全港紀錄時間，可謂露出真功夫，亦帶挈落飛黨中正綠燈WP及啡燈Q。
第七場二至四名順序為「龍船」、「勁趣」及「共創更好」，四重彩派七萬二千幾。