華人騎師這晚（14日）谷草表現甚佳，23歲見習生巫顯東包辦第二口孖寶後，第四場三班1000米輪到華將大師兄、足足大佢廿歲的賴維銘發威。現年43歲的賴維銘今場夥拍蘇偉賢馬房「財神」後上一攻而破，錄得個人今季首次贏馬，至於「財神」季內初嘗勝果，單Win及組合獨贏A3分別派302.5及68元。
作為現役最年長華人騎師，出道初期外號「香港戴圖理」的賴維銘，上季只贏「創意寶」一場賽事，另有兩亞兩季，之後他一度受傷患影響，缺陣足足一年半冇出賽食穀種，今季延至4月12日至首度上陣，結果臨近煞科才憑「財神」開齋，是賴仔個人20個月來首場頭馬，可謂苦盡甘來。而大肚人妻黃婉曼，亦有份見證賴維銘這天出走人生黑暗期的一幕，她入場支持「財神」馬主，一齊拉頭馬。
雖然賴維銘近年成績持續低迷，兼不時因傷缺陣，但日前照樣獲馬會發給來季騎師牌照，得以保住飯碗。
講番「財神」，前次出賽流鼻血，上仗久休復出配韋紀力跑田草直路賽，只輸兩個幾馬位，呢次跑番谷草場地，初配賴維銘負磅全場最輕（114磅），早段守八九位，單跑直路最後幾十米，以勁勢追上殺敗最先突圍的雷神大熱座騎「首映」贏頸位，人馬同樣跑出代表作。
「首映」功敗垂成焗做二奶，三、四名順序為落飛馬「威先生」及陳慧琳父親陳崇偉團體馬「鑽石巨匠」，四重彩派五萬二千幾。