「攞去使啦！臭雞。」「鷲哥」吳岱融舊年同李佳芯喺大台劇一幕對手戲中呢句對白，震驚唔少觀眾，礙於香港電視劇尺度所限，好多鏡頭同言語都唔能夠去得太盡。不過，男友係天津權健球星柏圖嘅巴西女星費安莉娜（Fiorella Mattheis），最近就參演一齣名為《Augusta Street》嘅電視劇，飾演一名妓女，仲會喺鏡頭前有性愛場面。喺宣傳片段裏面，費安莉娜話叫咗柏圖唔好睇呢套電視劇，但柏圖喺社交網站上回應：「哈哈，我好想睇！
難抵long D祼照傳情
27歲嘅柏圖曾經係巴西國腳，2007年加盟AC米蘭後冒起，當時被視為巴西國家隊嘅新希望，但後來因為受到傷患困擾，喺歐洲球壇過得唔如意，曾經短暫效力維拉利爾同車路士，不過最後都冇乜成績。喺今年，佢離開「黃潛」，轉投中超嘅天津權健，實行搵人仔。
由於女友費安莉娜要留喺巴西繼續佢嘅演藝事業，唔能夠長期喺內地陪住柏圖，兩口子相隔兩地，為咗可以keep住呢段關係，其中一個維繫感情嘅方法，就係間唔中會互傳裸照慰藉相思之苦。知情識趣嘅費安莉娜好大方咁話：「我間中會send啲裸照畀佢，有時佢亦會以裸照回覆，大家都會覺得好好笑。有時候就算我嚟咗中國，都一樣會咁做。」
跟得女友不時飛京滬
當然齋睇相點都唔及見到真人咁好啦，所以費安莉娜一得閒就會做「跟得女友」，特登飛到內地入場睇中超捧男友場，月初佢就見證權健作客以2:1擊敗山東魯能，之後仲趁住國際賽空檔結伴同遊上海、北京等，羨煞旁人！
柏利搵人仔唔寂寞
柏圖要同女友long D，要互傳裸照慰藉相思之苦，山東魯能嘅前鋒加斯安奴柏利（右）就幸福得多，因為佢嘅22歲模特兒女友維歌莉亞（左），唔單止陪佢定居中國，仲不時入場支持，完全冇相思之苦。維歌莉亞來自匈牙利，為咗柏利放棄意大利嘅天橋工作，不過喺中國憑住咁索嘅面孔同埋身材，一樣大把jobs。除咗做模特兒外，維歌莉亞一樣係跟得女友，入場支持柏利嘅比賽，冇波踢嘅日子，仲陪佢去中國唔同城市觀光，維歌莉亞更加喺個人ig大讚北京烤鴨好食㖭，夠晒地道。
