內地人喜歡用「你懂的」去迴避敏感話題，2014年兩會舉行期間，連全國政協發言人喺記者會上，被問及大老虎周永康是否正受調查，都用內地網絡潮語「你懂的」做官方回應。不過可能係文化差異，港人對呢句就未必受落，之但係受落唔受落，反正某啲場合總有人繼續loop！
噚日由中銀香港（2388）同香港中國企業協會合辦嘅慶回歸兼中國對外投資高峯論壇上，請來鳳凰衛視財經節目主持人曾瀞漪做主持，佢就不忘用「一帶一路」嚟寸下老外，完全符合國情。
佢指，上月中北京舉行一帶一路峯會，參加者收穫豐富，「不來的又很焦急，令到有國家心癢癢，不來又來，說的是誰？」，「你們懂的」！估計佢口中不來又來者，係峯會前幾日，突然話認識到一帶一路好重要，都要派代表參加嘅美國總統特朗普。
論壇除咗一眾中資老總出席，都有唔少財經界猛人亮相，好似剛成功出售有線嘅九倉（004）主席吳天海、紅籌之父梁伯韜，同近期締造新商業地王記錄嘅南豐主席梁錦松。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk