英格蘭久旱逢甘霖首奪世青盃冠軍，香港仲有唔少港英餘孽，叫做睇英國波大，就算英格蘭大國腳近期已淪為一線頭二線尾球隊，但每逢大賽都仲有基本捧場客；猶記得02年世界盃，英格蘭有萬人迷碧咸，連同史高斯、奧雲等英超名將，分組賽對阿根廷嘅大戰，小弟喺茶餐廳欣賞，當時英阿球迷比例似乎達8:2之比，碧咸射入12碼全場歡呼嗰刻，直頭以為自己去咗倫敦啲酒吧一樣，不過同之後大賽命運相似，高開低走之下，八強俾巴西淘汰。06年世界盃一樣好好J，有雙特、祖高爾，更解決長期左中場荒，不過咪又係八強止步。
今次小英軍拎到世青盃冠軍，但誠如戰友咖喱所言，呢班所謂功臣返到英超球隊報到，又有幾多可以拎到正選機會。莫講話小英軍，連大國腳都有問題，英超Big 6冇一個正選門將係英格蘭人，赫特今夏返到曼城報到，都唔會有運行，睇吓會放去邊隊。堂堂英超冠軍，車路士亦只有中堅加利卡希爾係現役英格蘭國腳，反而比利時仲有夏薩特、泰拔高圖爾斯等人，唔知以為係比甲冠軍。
放眼歐洲唔少傳統國家隊，都往往同國內頂級聯賽球隊有連繫，好似意大利國家隊，唔少嚟自祖雲達斯，德國就大部份嚟自拜仁慕尼黑同多蒙特雙雄，西班牙就由巴塞隆拿同皇家馬德里包辦，起碼班國腳平時都喺聯賽夾慣夾熟。
英超亞軍熱刺近年打起唔少新星，特別係英格蘭人，前鋒哈利卡尼（圖）已經貴為隊長，迪利阿里、艾歷迪亞等都成國家隊新貴，𠵱家就要睇英軍領隊修夫基夠唔夠膽將英格蘭未來支柱，連繫喺熱刺身上嘞。
文：牽牛