天文台今晨四點幾取消八號風球，改掛三號風球，但由於太大雨，風勢亦非常強勁，視野亦唔算太清晰，所以今朝草地及泥地大閘都取消，順延至周三才舉行。
練馬師呂健威就最勤力，未到五點半就已經到咗烽火台，隨後文家良、蘇偉賢、李易達、容天鵬、吳定強、高伯新、方嘉柏等亦陸續到場，視察現場情況，睇睇是否適合馬匹出操。結果全朝操馬非常疏落，差唔多到六點時，62歲老牌廐主告一啲都唔錫身，大雨下親自策騎無賽程馬「勁兔皇」出大圈踱步，成為今朝首匹大圈出操馬；而將角逐周三(14日)第五場四班1200米之「你知我意」亦由告達理主操，有晒搏殺手影。
另一方面，今朝沙田馬場橫風橫雨關係，各人操馬時都加倍小心，期間有個大桶吹入機坪，嚇到一匹馬不受控制急速驚閃，幸無造成意外，當時在附近冇份操馬的騎師李寶利，隨即幫手執回該大桶，放返機坪之外，唔想其他人出事，非常有公德心，值得一讚。