光影之間講香港故事，已故攝影大師何藩逝世近一年，第4本攝影集《念香港人的舊》終於出版，153張從未曝光嘅舊香港相片，見證50、60年代香港社會面貌。獨家代理何藩攝影作品嘅藍蓮畫廊創辦人Sarah Greene話，何藩兩年前開始揀相、剪裁底片同寫標題，直至去年6月19日離世當日仍然討論點揀封面。
最後作品集「重見人間溫馨」
新書收錄何藩拍攝人像相片，街頭小販、路邊小孩和漁港面貌，Sarah話當年嘅沙龍對呢類寫實相片唔感興趣，所以一直冇發表，但何藩就好鍾意呢批相，今次出版總算不負何藩臨終所託。大導演吳宇森為新書寫序，分享當年開會或者討論電影，何藩一入房就會除鞋行嚟行去，如同謫仙。吳大導讚揚何藩以赤子之心影相，作品令人想起人與人之間互相關懷，重見人間嘅溫馨、善良。
蘇富比藝術空間由今日起至30日舉辦「何藩：鏡頭細訴香港光影」展售會，喺太古廣場1座5樓展示何藩超過30幅手洗攝影原作，亦展出何藩終身相伴嘅相機Rolleiflex f3.5。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk