早排基沙文加盟曼聯嘅傳聞傳到沸沸騰騰，好似佢去硬咁嘅樣，有啲魔迷自以為早買早享受，印定基沙文嘅7號曼聯波衫，點知原來係自作聰明，因為馬德里體育會今夏被禁轉會，成單轉會新聞風向180度大轉，基沙文話要做義氣仔女留隊，最新仲有馬體會證實佢已經同球會續埋約。不過，印咗基沙文波衫嘅魔迷唔使喊住，話唔定出年一月會用得着。
記得冇耐前，基沙文喺電視度話有六成機會加盟曼聯，又話準備好走人，真係令魔迷好興奮。與其就咁憑空FF基沙文同保羅普巴嘅黃金中軸線，有人就印定件基沙文7號波衫，準備好迎接呢位法國球星來投。
8.8億解約金冇變
不過，自從馬體會被禁買人嘅上訴被駁回後，成件事突然大變，基沙文決意留隊。早兩日佢喺instagram上載一張腕帶印有馬體會隊徽嘅「大手牽小手」相，似乎係另一效忠宣言。西班牙《馬卡報》周一報道，話法國射手基沙文已經同馬體會續約多一年至2022年。之後官方亦喺周二證實咗有關嘅消息，意味基沙文今夏加盟曼聯嘅傳言可以告一段落。基沙文續約後，仲有得加人工，年薪會去到1,400萬歐元。
講完效忠又同馬體會續約，睇嚟26歲嘅基沙文已經成功加入曼聯嘅險簽大軍，同卻奧斯、法比加斯等一齊做險簽大軍嘅隊友。睇到呢度，印定咗基沙文波衫嘅魔迷又唔好太絕望住，因為呢次續約內有玄機，話唔定基沙文遲啲會嚟曼聯。
普巴19號殺到香港
以往基沙文兩次同馬體會續約，解約金條款都會增加，但呢次份新約嘅解約金冇變，維持一億歐元（約8.8億港元），意味曼聯嚟緊想簽基沙文都唔使加碼。英國傳媒都話，曼聯只係放棄呢個夏天簽基沙文，唔排除等馬體會嘅買人禁令解除後，喺出年冬季轉會窗或者出年夏天再出手，請基沙文入魔。
另外，紅魔又有球星嚟香港喇，隊中法國中場保羅普巴會喺今個月19號殺到，仲會去「三間」喺尖沙嘴嘅旗艦店同粉絲見面同簽名。