目前全港最高分灰馬，係告東尼馬房現評118分之「大印銀紙」，其實此駒已由最高峰125分，減了7分，今季屢戰仍未上名，更因右前腿懸韌帶腫脹，已停操一段日子。
至於全港最忠心灰馬又係邊隻呢？如果話係姚本輝馬房之「包裝騎士」，相信都唔會太多人反對。呢匹5歲馬都算長跑長有，上季取2冠3亞1季後，今季踏入5歲實力進一步提升，輾轉又再取4冠4季佳績，累積獎金逾720萬之多，亦是百萬挑戰盃總冠軍，贏到家陣100分，剛好仍符合資格跑周三晚(14日)100分上限之快活谷第七場二班1800米，當然要把握這個機會再出擊啦！
「包裝騎士」其實最初唔起眼，服役頭8仗不勝，第9仗才於四班開齋，之後才越跑越進步。而此馬跑同程谷草1800米威力最強，7戰得4冠2季1殿，此路程準到冇朋友。今仗排11檔亦毋須擔心，事關「包裝騎士」有個獨特性格，就是外檔冇遮擋反而走得更起勁，過去6次贏馬，竟有5次是排9至12檔建功，由此可見一斑。