一代巨星柯德莉夏萍（Audrey Hepburn）粉絲要留意！佳士得拍賣行9月喺英國舉行柯德莉夏萍主題拍賣會，焦點拍賣品包括名作《珠光寶氣》及《花都奇遇結良緣》劇本，劇本邊緣位置及左面頁面有佢親筆筆記，非常珍貴，前者估價為6至8萬英鎊，後者估價1.5至2.5萬英鎊。
拍賣品唔少得柯德莉夏萍嘅靚衫。一條來自佢著名設計師好友Hubert de Givenchy手筆、藍色緞面cocktail dress，估價1至1.5萬英鎊（約9.9萬至14.8萬港元），佢喺1966年宣傳電影《儷人行》時着過。仲有一件Burberry乾濕褸，估價6至8千英鎊，以及多對唔同顏色嘅芭蕾舞鞋，估價1,500英鎊起。拍賣品全由其家族擁有，9月23至26日喺佳士得倫敦總部展出，27日拍賣，部份會喺9月19日至10月3日開放網上競投。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk