呢期高官為咗慶回歸，空群出動落區探訪兼向市民派禮物包，就算打風落雨都要照出發。保安局局長黎棟國同環境局局長黃錦星噚日雙雙喺風球下出巡，黎棟國朝早到訪屯門區，先喺「共慶回歸顯關懷」計劃屯門區啟動禮上向參與嘅社福機構同地區團體義工頒發感謝狀，其後就喺保安局副局長、即係盛傳會接佢棒嘅李家超陪同下，與屯門區議會主席梁健文探訪蝴蝶邨6戶家庭。
有傳媒問及國家領導人係咪會喺回歸期間訪問香港，黎棟國只稱接近回歸周年嘅時間就會有公佈。
黃錦星就同副局長陸恭蕙喺8號風球打到嚟前夕，到上水彩園邨探訪基層家庭，佢喺家訪前仲借天氣論回歸，話香港回歸20年間雖然好似今日（噚日）天氣咁遇上一啲風雨，但相信「明天會更好」喎。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk