新任通訊事務管理局主席、律師會前會長王桂壎為人風趣搞笑，舉手投足好有喜劇感，可能拜許冠文所賜，皆因呢位冷面笑匠喺聖芳濟書院教書時做過阿壎班主任，耳濡目染，「唔少人都話我似佢」，佢曾經喺機場撞過真．許冠文，上前相認，對方相見不相識，「唔知我係乜水」。
66歲嘅阿壎笑談自己係多嘴仔，自小好奇心極大，「啲玩具玩唔夠15分鐘，就拆散佢睇吓裏面有啲乜」。爸爸係小學中文教師，難怪佢10歲大已對宋詞唐詩琅琅上口。佢話當年中文老師人工好奀，一家七口靠爸爸嘅薄糧餬口，5兄弟姐妹中身為大哥嘅佢知道冇錢開飯，無形壓力最大。
小學已經踩單車送貨幫補家計，勤力讀書考入聖芳濟書院。熱血青年愛夾band，「狂幫人補習儲錢買結他」，讀書唔算勤力直至中四遇到一個她先發奮圖強。考入中大歷史系時有咗新目標，是它不是她——想要部車風馳電掣，「唔辛苦邊得世間財？」
入理民府學法律
當時佢喺兩間中學兼職教書，夜晚就教夜校，1977年畢業後喺新法書院執教鞭教英文，自爆會做埋戲角色扮演；朋友慫恿下考政府工，最終喺理民府做地區事務同新界村民「交流」，在職時學法律知識例如收地程序等，興趣開始嚟嘞，之後到英國Guildford College讀法律，1985年成為英國倫敦大學法學士。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk