樂壇有個「周柏豪」，商界同樣有個「周柏豪」。仲有兩個月就21歲嘅「洗米仔」周柏豪，係洗米華、即太陽世紀主席周焯華個仔，由佢創立嘅拍賣應用程式「Oction」已經上架，日前洗米仔接受本報專訪，大講爸爸對自己嘅影響。
講到近年洗米華因為周旋喺正印陳慧玲同Mandy Lieu之間而成為娛樂版紅人，唔知洗米仔創業過程有冇因為爸爸「走紅」而受影響或構成障礙？洗米仔話：「冇喎！唔會有障礙！同埋唔會埋怨，因為屋企有資源畀我去外國，令我有更闊嘅視野，可以講創意。如果要養家就好難講創意，會變為防守，我𠵱家可以打進攻。」
父子少講私人嘢
洗米仔話細個好少機會同爸爸相處，但佢話爸爸對自己有好大影響：「係好嘅影響，佢做嘢方式，堅持、進攻，佢嘅行動比言語重要。」兩父子最大話題係乜？洗米仔話：「我哋好少講私人嘢，生意我唔會問佢，開記者會都係幾日前同佢講，都係講生活上嘅嘢。」佢仲自認冇童真，3歲已經睇阿仙奴對曼聯，對卡通片完全冇興趣。
訪問當日洗米仔去球場打籃球，見佢不停射籃，堅持到中籃先肯停，佢話：「我覺得堅持好重要，讀書、工作都係，唔堅持好易俾人淘汰。」
撰文：馮仁昭
