有民建聯立法會議員蔣麗芸嘅地方，真係唔怕有悶場！繼倡議成立流浪貓滅鼠隊，同九西有鼠王芬之稱嘅經民聯梁美芬隔空過招搶風頭之後，元秋又有新猷，呢次唔關地區衞生問題，但連他人嘅飲水習慣都關注埋。
元秋噚日喺fb上載一張叉腰手指指眼神凌厲並有大嘥鬼同佢一齊嘅圖，寫明「議員只准飲半杯水」，乜事咁專制連一杯水都唔畀飲？元秋自行解謎，佢話大家成日話要珍惜食水，但有啲議員卻係大嘥鬼，指立法會每次開會都為議員斟滿成杯水，但好多時都冇飲完、非常浪費，佢特別為此去信立法會行管會，建議每次限斟水半杯，引述行管會從善如流，回覆話會提醒管事斟水時嘅份量㖭呀！
俾人發現用紙杯
哦，原來連斟水問題都成功爭取，難怪要喺facebook公告有幾「威水」，但有網民卻好醒水，發現元秋日前開會時用紙杯飲水，質疑佢唔應該就此抽水，唔知元秋會否就此反擊再噴口水？
而呢個口水po出咗之後，連「暴龍哥」鄭中基都轉載喎，而且仲盡訴心中情，佢話喎：「出半份糧畀你已經很浪費」，會唔會講中唔少香港人嘅心聲？
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk