一到夏天，豪門球員轉會傳聞滿天飛，尤其係風頭躉英超嘅曼聯，好多球迷特別關心佢哋會簽邊個前鋒頂替伊巴謙莫域個位。除咗西班牙嘅艾華路莫拉達，意大利「公雞」比洛迪亦係熱門人選，呢位合約贖身費達一億歐元（約8億7,000萬港元）嘅拖連奴中鋒喺周日世盃外歐洲區G組賽事，入一球兼貢獻一次助攻，助意大利主場5:0大炒列支敦士登，呢一晚之後身價隨時又升。
入波助攻幫意國贏5:0
曼聯唔同伊巴續約，今夏勢必會簽個世界級前鋒，傳聞目標唔少，包括有艾華路莫拉達、基利安麥巴比同埋效力意甲拖連奴，上季射入26球嘅比洛迪。意大利主場出擊迎戰魚腩部隊列支敦士登，本來開波一分鐘多啲就先開紀錄，簡達華接應隊友近中場線長傳，球不着地窩利射入，但被誤判越位在先。意大利要到35分鐘終先由恩斯治尼打開紀錄。
下半場意大利嚟料上演入球騷，比洛迪喺52分鐘靈活走位突破對手防線，接應恩斯治尼傳球單刀埋門得手射成2:0，入波之後梗係做佢招牌慶祝動作扮公雞。74分鐘，比洛迪又攝到靚位，喺右路接應再傳中，造就艾達馬田斯入波。之後意大利再入多兩球，完成5:0大捷。
意大利全取三分之後，喺G組繼續同西班牙同分，六戰五勝一和只係得失球差唔及後者排次席，keep住繼續贏，就算最後搶唔到小組首名，都好大機會拎到最佳次名。
踢完國際賽做老襯
有英媒話要買比洛迪，預計轉會費至少要7,000萬鎊，即係大約8,000萬歐元，不過就算曼聯肯畀呢個價，買唔買到都成問題。比洛迪早前同拖連奴續約，合約贖身費加到一億歐元（約8億7,000萬港元），球會主席卡爾路就一副唔憂賣嘅樣，日前接受意大利當地電台訪問就話：「比洛迪呢排好忙，踢完國際賽之後到周四會同佢愛人拉埋天窗，我都獲邀出席。我好在乎佢，希望佢可以繼續留喺拖連奴，佢同球會到2021年先約滿，邊個要買佢唔該先去準備一億歐元，就算有球會肯畀，都仲要佢本人願意走人，我亦相信佢喺拖連奴過得好開心，唔打算走人。」