【本報訊】特首梁振英上任後下令，所有政府委任公職如大學校董及重要諮詢委員會成員都要諮詢中央政策組全職顧問高靜芝意見，本報向中策組查詢過去5年就人事任命提供的意見或建議次數，獲覆總數共達622次，有議員斥梁振英藉高靜芝為其建立「梁粉」山頭，揀蟀時非用人唯才。
記者：許偉賢
本報向中策組查詢截至今年5月中，過去5年就諮詢委員會及法定機構人事任命事宜提供的意見或建議次數，發言人提供的數據顯示總計達622次，當中以2016年最多，達157次，2015年亦達142次，這兩年梁振英鋪路組班爭連任的消息不絕，直至2016年12月初，梁被中央突然「DQ」（不支持連任），始宣佈放棄冧莊。
發言人強調，中策組只限於就人選提供意見或建議，最終提名及委任名單由決策局和委任當局自行決定，中策組無權批准或否決委任，但前立法會議員、公民黨陳家洛對此質疑，不信政策局會逆旨，直指5年來委任多名爭議「梁粉」，「削弱香港核心價值、削弱機構監察力、削弱文明管治制度」。
陳家洛促林鄭解釋任命權
譚惠珠出任廉署審查貪污舉報諮詢委員會主席，周浩鼎續任平機會委員；何君堯是嶺大校董，陳建強掌舵港台顧問委員會，連同港大校委會由李國章揸旗，郭琳廣領導監警會，均引起不少爭議，陳直指：「梁振英眼中嘅『人才』，真係好特別」。
他曾於2012年11月曾去信時任政務司司長林鄭月娥，要求解釋中策組的人事任命權，正是預料爭議任命會不絕：「無端白事殺出一個機制，由中策組審查人事任命或畀意見梁振英……咁就大件事嘞，講關係、講意識形態、講同CY啱唔啱嘴形」。
陳家洛指當中尤以委任譚惠珠最有問題：「呢個位係好多機會同特首傾偈、會同特首討論一啲佢喺委員會發現嘅問題……CY同建制派都成日被人舉報喎，佢（譚）坐喺入面做過啲乜？點樣影響ICAC嘅工作？完全冇人知。」
譚惠珠掌ICAC委會具爭議
民主黨立法會議員涂謹申亦指，梁振英處心積慮安插高靜芝入中策組，旨在建立其「梁粉」山頭，他對委任譚惠珠掌廉署審查貪污舉報諮詢委員會最反感，「因為ICAC要取消行動或結案，都要呢個委員會通過」，過往一直由中立人士出任此職，「但佢（譚）極端親共，甚至一路捧梁振英」，「擺佢入去可以控制廉署結案，所有最機密嘅嘢佢都睇到，係好危險嘅事」，強調當高靜芝代表梁振英「揀蟀」，「非我族類嘅係唔會被委任入去」，「唔係量才而用，意見根本一面倒」。
隨着候任特首林鄭月娥稱會改革中策組，陳家洛希望專責研究工作的中策組重回正軌，「唔會只係屬於一個人嘅智庫，而係屬於全香港市民嘅智庫」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk