霍利時馬房「常妙星」雖然已7歲，但今季仍可兩捷，服役累積有6場頭馬之多，其貴氣女馬主朱明雅，可以話相當有運。
「常妙星」的整體戰績，完全講唔上一個差字，以一匹質素唔太高嘅馬來講，有6Win已經超額達標有餘。但有一樣嘢「常妙星」卻實在非常差，就係佢嘅谷草紀錄，12戰零上名，堪稱大盲門。
偏偏「常妙星」又向虎山行，將跑周三（14日）快活谷四班1650米，無非貪谷草對手較弱，但霍利時及朱明雅有乜辦法打破隻馬嘅盲門數據呢？方法其實好簡單，就係今次搵咗神級騎師雷神莫雷拉騎囉！
雷神過去曾策「常妙星」兩次得1冠1季，人馬好合拍，季軍一役在四班只輸半馬位給頭馬「變出美麗」。睇番「變出美麗」之後二班亦上名，最高升到84分。今仗「常妙星」只45分，首次配雷神跑谷草，既有佢助陣，真係乜盲門都唔驚啦！