徐克執導嘅《狄仁傑之四大天王》已經喺北京開咗鏡，劉嘉玲、趙又廷、林更新同馮紹峰都齊集當地開工，上星期甘國亮專程去探班，當晚收工，嘉玲仲請甘國亮同徐克去食日本菜。聽講呢集嘉玲戲份比第二集多，所以佢會乖乖留喺北京個幾月開工。
嘉玲性格好動，唔使開工時，佢會約吓朋友食飯、睇戲，而前日一大早佢又約咗幾個朋友去咗萬里長城行山，仲將照片放上微博。
「感覺好唔同」
噚日打電話畀嘉玲，問佢做乜咁有閒情逸致去行萬里長城？佢話：「係呀！噚日同班朋友約埋去咗長城爬山，我平時喺香港都有行山，而長城係我一直想去爬山嘅地方，所以趁今次嚟北京拍戲，咁啱噚日又唔使開工，咪約咗朋友去，我哋主要喺古北水鎮嗰邊行，叫司馬台長城，過咗我哋終點嗰個門，外面就係金山嶺長城，呢段冇乜人，所以朋友帶我行呢邊。」
問嘉玲行長城同香港行山有乜唔同？佢話：「感覺真係好唔同，人企喺咁偉大嘅長城遙望中國大地，特別精神爽利。」
撰文：馮仁昭