林鄭月娥當選特首以來，理應做好交接工作嘅梁振英，疑似處處放蕉皮跣對方，例如林鄭話要擱置小三TSA，佢就急急撲出唱反調，好似唔想畀對方攞彩咁。距離梁特離任不足一個月，唔少政壇花生友估緊佢仲留低啲乜嘢蘇州屎畀奶媽收拾殘局？有人認為取消強積金對沖呢筆數，689可能都會搵777幫忙找數。
當年勞工界支持梁振英，無非因為佢嘅政綱承諾逐步降低強積金對沖比率，佢喺任內最後一份施政報告終於提咗出來，隨即諮詢公眾3個月，打算7.1卸任前敲定方案。之不過政府、商界、勞工三方面嘅要求，大纜一直都扯唔埋，取消對沖問題始終膠着，而梁特早前喺答問大會被工聯會議員「追數」時未有明確回應，但稱會喺未來繼續努力處理。
勞工界覺得呢個說法暗示689走數呼聲高，但有商界人士唔係咁睇，覺得以689個性加上近期對林鄭嘅表現，最終卸任前推個勞工界主導嘅方案都未定，屆時商界定必反晒枱，臨走都留個殘局畀奶媽收拾！
其實歷屆政府唔掂對沖，因為知道呢個係商界喺勞工議題上守得最硬嘅一條線，所以梁特政綱提出後，有政府中人認為佢輕視問題嘅阻力同難度，事實係佢上任後一直推唔到，拖無可拖先喺最後施政報告提出，呢個縮骨處理旨在對工聯會交差，扮兌現競選承諾，但實際執行仍然係由下屆政府囉。
花生友
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk