林敏驄紅館演唱會日前發生塌台事件，嘉賓之一蔡一智臀部受傷，草蜢另外兩位成員蘇志威、蔡一傑則冇事，雙雙逃過一劫！
據知蘇志威塌台時成個人跣落底，但絲毫無損都算神奇，不過佢嘅幸運唔能夠帶俾愛駒，這天（11日）沙田日馬，蘇志威名下由鄭俊偉訓練的4歲馬「駿王」角逐第八場三班泥地1200米，首次在港出賽是29倍冷門，結果大包尾跑得第12名，輸一條街27.75馬位，未能取得分文獎金。
塌台事件後蘇志威這天首次公開現身，和太太劉小慧一齊現身沙田撐場打氣，自然成為焦點，而「駿王」由法籍騎師杜利萊執韁，從10檔劣位起步後，一直沿途居後毫無走勢，體重逾1200磅大馬首次出賽，未曾有熱身戰下明顯不在真正作戰狀態。
至於第八場頭馬為途容天鵬馬房、潘明輝策騎之「盈利駿馬」，無懼12檔帶放下贏0.5馬位取勝，單Win及組合獨贏A3分別派90.5及28元。而楊明綸代替受傷退陣的祈普敦，騎「鐵男」後追第二。
值得一提，「鐵男」上次大敗15.75馬位，隔三星期再跑得第二，表現可謂由蟲變龍。今場三、四名分別為「香江穩勝」及「勁優秀」，四重彩每注派17.9萬元。
蘇志威是經前馬王「精英大師」馬主施雅治，向馬會推薦成為會員的。之後蘇志威以7位數價錢買入「駿王」，此匹美國馬來港前只贏過一場1100米膠沙地賽，亦於美國金門園馬場1700米膠沙地表列賽加州打吡跑第二。
但來港後由於一對前蹄球節患有腳掌軟骨病，曾經重傷面臨退役，早前未跑已由沈集成轉投鄭俊偉馬房，因此抵港大半年，直至今日才初出。
蘇志威及太太劉小慧非常愛錫「駿王」，此駒之前兩次於早上試閘備戰，他們均有到場探班。其中本月2日的一次，更帶埋18歲大女蘇君蕎Yumi一齊睇馬，在馬場享受家庭樂。