由馬主許坤華及葉思貝夫婦擔大旗的「劍」系陣營，持有合共七匹有個「劍」字的現役馬，簡稱「七劍」。當中隸屬鄭俊偉馬房的「劍飛聲」這天（11日）勝出沙田馬場第三場泥地四班1200米，單Win及組合獨贏A2分別派47.5及21元，鞍上人雷神莫雷拉打開全日勝利之門。
現年七歲的老馬「劍飛聲」是年紀最大的「七劍」現役馬，服役初期由蔡約翰訓練取得五捷，上季尾轉投文家良後冇贏過，今季初再過檔加盟鄭俊偉。本身早前曾於泥地四班一哩中途被女見習騎師蔣嘉琦收停，冇完成賽事，之後驗過冇事並恢復出賽，到前仗跑田草1200米入Q，表現復蘇。
卒之花名「小白」的「劍飛聲」今日由雷神出馬，即以輕鬆姿態打破季內及轉投鄭俊偉後齋缽，服役頭馬增至六場，亦令「劍」系繼剛周三（7日）憑「劍凌雲」攻下谷草五班一哩後，繼續贏馬攞威。至於鄭俊偉季內增至14Win，贏多兩場就達標唔使收警告信。
第三場賽果熱頭冷腳，4.7倍「劍飛聲」取勝；之前僅兩戰均跑第13名的無厘頭冷馬「樂有福」今場198倍跑第二，連贏派超過2,600元，三、四名由一對有飛馬「幸運興隆」及「有禮」順序瓜分，四重彩派二萬八千幾。