公務員要求加薪，時時輸打贏要。政府根據薪酬趨勢調查及考慮每年公務員加薪點，向政府提出加薪建議後，交行政會議通過。年年如此，有乜好拗，偏偏當薪酬趨勢調查嘅結果不如想像中咁好時，公務員就鬼殺咁嘈，投訴調查不準確，唔公道，好似今年咁，嘈完一輪，公務員事務局就提交建議，加薪再加多0.5個百分點，高級公務員加薪1.88%，基層及中層公務員就加2.94%，但公務員工會仍然唔滿意。
老友記曾智華，係退休公務員，退休後咬糧，再加一啲兼職收入，每月印印腳，成日去咗珠三角、台灣，最近去九州浸溫泉，生活優哉游哉，佢話過：「好彩係公務員箒。」梗係啦，佢冇講攞到幾多長俸，左丁山斷估，點都有三萬銀一個月啩？一年就有36萬，以銀色債券利率2厘計，折回投資本金就等於政府送咗一千八百萬元退休金俾佢，一直到佢長命百歲為止。幾過癮呀，啲首長級公務員退休，仲更加開心㖭啦。
公務員話加薪幅度低，會影響公務員士氣，或不利招聘，真係搵嚟講。今日大學生個個想做公務員，入境處請入境主任，往有幾千人申請，女仔考到，有可能成為拍拖分手嘅理由。睇真吓啦，大學生入銀行做見生，除非係做ibank，否則一般只係得萬四至萬五蚊一個月，入職四年後連埋升級都係得兩萬五千、兩萬八千左右，但入境主任起薪已經係三萬幾，四年後連埋加薪調整，已四萬過外，故此如有男女大學生拍拖，男的入銀行，女的醒目過人考到入境主任職位，係唔係分分鐘彼此會發生「薪酬差距症候」，如果男仔入咗新聞界工作，薪酬差距仲大到冇眼睇，或者因此而分手呢？今時今日，公務員薪酬好過商界好多，雖然已無長俸福利，但齋計現金收入，公務員已經贏晒。商界前線銷售人員（如地產代理）無疑係會享受優厚佣金，但嗰種跑數壓力，遠非朝九晚五、六嘅政府員工所能想像。想當年，藝術B曾在政府工作，要搞一個展覽會，佢在下午四點幾先至得閒開始佈置展覽場，做到五點幾，四五個工作人員話：「過晒鐘咯噃，我地放工嘞。」藝術B為之着急：「喂，聽朝開幕喎……」員工睬佢都儍，一哄而散，藝術B不知如何是好，結果一個月後佢就辭職不幹，在江湖飄蕩。每天諗起嗰筆可能得到嘅長俸，頭腦幾乎失衡。公務員在低息低通脹時期對加薪幅度諸多要求，成日話唔滿意，左丁山呢位納稅人唔buy囉！