冇咗前鋒伊巴謙莫域嘅曼聯，下季陣中繼續有瑞典人，球會上周六喺官網宣佈，已經同葡超冠軍賓菲加達成協議，將會簽入該隊嘅瑞典國腳後衞域陀連迪路夫。
曼聯方面冇透露轉會費數字，但據英格蘭傳媒報道，連迪路夫嘅轉會費約為3,500萬歐元（約三億港元），呢個價其實同今年一月傳嗰陣差唔多，值唔值就見仁見智喇！
靚女友原來係網紅
如無意外，22歲嘅連迪路夫會係紅魔今夏第一位新兵，會方喺聲明中好清楚咁講，已經同賓菲加傾掂數，現時就等佢周二幫瑞典國家隊踢埋對挪威場友賽，就可以去曼市做體測，然後傾個人加盟條件同埋辦理工作證，而球會亦話會喺一切落實後，再同球迷更新。
連迪路夫本身喺冬季轉會窗，已經同紅魔扯上關係，當時賓菲加好似想抬高個價，紅魔唔肯就範，所以單轉會最後不了了之，但領隊摩連奴已經鎖定夏天再出手，𠵱家終於成事。
連迪路夫過檔後，紅魔WAGs大軍亦會多一名成員，事關連迪路夫背後都有個好支持佢嘅靚女友瑪查妮爾遜。據講瑪查係做市場學，私下亦有個blog，專門講吓啲美容同旅遊資訊等等，好受歡迎。佢仲經常會喺ig上載自己啲靚相，有着住賓菲加波衫同入球場睇波嘅相，但下季佢件紅色波衫，就應該會由賓菲加變成曼聯嗰件喇。
月巴提早復操望留隊
另外，曼聯開始咗擴軍後，大清洗相信亦會陸續有嚟，連踢得咁好嘅伊巴都冇得續約，今季大部份時間都淪為後備嘅高薪隊長朗尼，當然傳好大機會被踢走。
不過，「月巴」似乎唔信命，堅持想留隊，所以紅魔雖然下月先開始季前集訓，但據報佢會提早兩周獨自先復操，操「弗」自己希望重獲摩佬歡心咁話。