梁班子就嚟同大家講拜拜，包括特首梁振英嘅御用KOL，專為689喺facebook、報章、網媒撰文做打手，並幫老闆拍片影相交畀「梁粉」陣地《港人講地》嘅新聞統籌專員馮煒光。未計39萬約滿酬金，自詡白宮發言人嘅IC一年穩袋逾340萬人工，八方趁呢位日薪近萬嘅梁粉KOL卸任在即，搵政界人士幫佢搵新工，令佢繼續為梁特「發光發熱」。
IC不時喺fb同專欄撰文，7.1後轉行做作家或者係出路，本身係人氣作家嘅民主黨鄺俊宇笑言若IC變成「同行」，擔心多個「勁敵」，並建議馮申請做真正嘅白宮發言人，因為其作風同美國總統特朗普「好夾」。要數馮任內表現，鄺指「嘆為觀止」，「佢人工高過奧巴馬，唔少朋友都覺得我哋公帑使得好唔抵，因為畀呢位朋友返工時間上fb，四周圍撩事鬥非」。如果硬要諗一個優點，佢話IC經常自我引爆公關災難，成功轉移視線，「相信為佢主子擋過唔少子彈」。
除咗作家同真．白宮發言人，公民黨楊岳橋建議馮轉做拳擊教練：「佢好鼓勵到人，就算唔出聲都可以激起大家心裏面嘅小宇宙。」直指日薪近萬嘅馮主要工作係上fb，好難搵到咁嘅「筍工」，「收住你（市民）嘅錢用fb鬧番你，有邊啲工作好似佢咁爽？」以「好行、唔送」話別對方。
梁繼昌：搵番個女朋友
因為狙擊梁特UGL案不時被馮撰文批評嘅專業議政梁繼昌直言，「我對佢實在冇咩印象，亦都唔知佢做過咩嘢（寫文有冇睇？）我唔會花時間睇佢啲文」，認為馮離開政府後都係做番公關啦，因為諗唔到仲有乜可以做。臨別有否贈言？「我送5個字畀佢：搵番個女朋友！」不忘對「三個字」先生抽水噃。
亦有民主黨舊黨友話馮應續做「梁粉」KOL，笑言「國師」陳雲做網台都聲稱一日有9萬元「課金」：「以馮嘅水準，建制派、西環點只課9萬畀佢？」
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk