大記者已經係一個四分三退休人士（還有四分一時間俾人捉去做公關顧問），每每心血來潮，得閒得滯，就走番去沙田故居種花。星期二中午又試捧兩盆花返回舊居，忽然聽到有人拍打大門口鐵閘，出平台一望，係菲律賓人，一老一少年，似係母子，於是大聲用英文詢問：「請問搵邊位。」菲婦答：「Madam，我係Karen呀，真好彩你會喺度。」邊位呀？似乎識得嘅，開閘迎賓，菲婦來一個熊抱：「我係23年前嘅菲傭Karen呀。」於是相認一番，大記者容貌冇乜變，菲傭好容易認得佢，但菲傭Karen就老咗黑咗肥咗好多。
大家坐低飲杯茶，Karen話回菲後嫁咗人，已有四個仔女及一個孫，現在已53歲，今次全家來港旅遊，老公帶仔女上萬佛寺觀光，佢就記得條舊路，叫細仔陪佢上嚟舊居，碰運氣，睇搵唔搵到舊老闆──即係大記者父母。其實大記者全家早已搬離，今次能與Karen重逢，全憑有緣。總之你對人好，人對你好。大記者一家人對菲傭素來照顧周到，節有節賞，年有年賞，菲傭生日有利是，家裏食物若非鮑參翅肚等等，任食唔嬲，常常一齊飲下午茶，現任工人去迪士尼，佢又津貼，收兩百元就同菲傭買一張入場券，難怪菲傭離開23年後還要趁住機會走番嚟碰運氣搵佢一聚。
因是之故，大記者對香港不時發生僱主虐待外傭，或者外傭虐待僱主之嬰兒呢類事情，大感奇怪，覺得不可思議。事實上，一樣米養百樣人，見過一啲鄰居出入豪華房車，到會所吃靚嘢，但竟然嚴限菲傭在家一日三餐公仔麵，有時見到人哋菲傭瘦得沒精打采，其實咁嘅狀態，家務邊會做得好呀，點有心機餵嬰兒食奶呀？曾有一次，左家菲傭偷送月餅往隔壁，俾左丁山撞到，菲傭連忙解釋，左丁山對佢講：「橫掂我哋食唔晒，你送多一兩個月餅俾同胞啦。」鄰居後來知道菲傭食月餅，查明來由，出門見到左丁山就黑口黑面，其實請菲傭印傭，都係想搵人幫忙處理一啲家務繁瑣事啫，冇佢哋，兩公婆點可以日頭返工返得安樂呢，點樣湊仔女呢？對工人唔好，你想工人對你啲仔女好？虐傭乃天下最笨之事，正是搬起石頭砸自己腳，蠢到加零一，有基本常識及公平意識嘅僱主，都唔會咁樣做。外傭每日在家24小時，應視之為家庭成員之一，務要維持良好關係。左丁山自1982年起請菲傭至今，只請了三位，全無煩惱，未必無因嘅。外傭對香港經濟發展好有貢獻，促進香港生產力，虐待外傭是無天理。