伊巴謙莫域呢隻雖然係傷腳，但絕對唔係黑腳！喺佢嘅支持下，瑞典喺上周五世盃外歐洲區A組主場以2:1反勝法國上榜首。呢場波法國射手基奧特入咗個世界波開紀錄，但可惜門將洛里斯完場前派膠，搞到法國先勝後敗。
法國為咗力保首名強陣出擊，保羅普巴、皮耶、基沙文等悉數正選披甲，37分鐘基奧特更喺左路禁區「畸角位」左腳控高再狂抽遠柱入，為「高盧雄雞」開紀錄。今場國家隊比賽，基奧特力壓「新亨利」基利安麥巴比擔正攻堅；可能基奧特知道阿仙奴領隊雲格想買麥巴比，所以佢要用世界波證明畀雲格睇，最強之人已在陣中！
雖然前場有基奧特發威，但後防派起膠上嚟，真係唔夠輸。瑞典四分鐘後就憑效力法甲圖盧茲嘅占美杜馬斯禁區內勁射扳平。以為雙方和氣收場，點知洛里斯喺完場前10秒接應回傳無端端控多腳出禁區，喺對手前鋒力逼下草率解圍，結果托禾倫喺中場線第一時間射入空門，為瑞典絕地反勝2:1完場，難為洛里斯抱頭後悔已太遲！法國輸波令A組形勢變得混亂，瑞典同法國同得13分，以較佳得失球升上榜首。同日荷蘭大炒盧森堡，就以10分排第三。