離開平機會後，周一嶽較少公開露面，佢噚日為健康產品活動主禮時，一度被推銷護髮產品嘅印度男子捉住，希望佢可以幫襯吓。 𠵱家已經70歲嘅周一嶽，頭髮仲好濃密，佢一聽到有人叫佢買護髮產品，即時笑咗出嚟，仲話自己老竇90幾歲時仲成頭頭髮，相信自己有相同基因，所以唔擔心甩髮，結果就請該名推銷男「食檸檬」。
自稱有過度活躍症
周一嶽又話，自己冇食健康產品習慣，笑言自己唔算好健康，因平日瞓得少，但好在甚少失眠，加上可能有少少過度活躍症，自小已做好多運動，所以現時身體都算健康。佢又話，其實退休咗幾個月，最近應一保險公司邀請出任顧問工作，現時生活都算過得開心。
至於同場嘅前立法局主席、現年已73歲嘅「發叔」黃宏發明顯唔夠周生濃密，但都好精神好健康，發叔話自己冇食健康產品習慣，認為最重要係食啲天然嘢，除非有病先會食藥丸，話近年主要去馬會上堂做瑜伽同行山，認為長者最重要係得閒郁吓肌肉同拉筋喎。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk