離特首梁振英下台踏入最後3星期倒數，唔少香港人開心都嚟唔切之際，有「梁粉」組織亦準備「歡送」梁振英，包括過去5年經常搞唔少閉門活動，曾安排梁粉傳媒「港人港地」作獨家報道嘅香港齊心基金會。不過呢個歡送會都好秘密吓，連建制派都唔係人人收到邀請，恐怕只有真正「梁粉」先有機會參加。
建制非人人有份
其實呢個聚會係冇寫明係歡送會，八方得悉齊心基金會聽日下午將喺尖沙嘴龍堡國際搞聚會，個名叫「我和CY有個約會」，最近已向一眾梁粉友好發出邀請函，不過邀請函提到「時光荏苒，數年匆匆過去，特區政府亦換屆在即」，話基金會有幸邀得梁振英出席茶敍，「與大家分享過去服務香港的點滴」，預計茶敍搞足3粒鐘先完。
邀請函入面又寫明，只限受邀人士參與，不接受現場報名，仲寫明「不設傳媒採訪」，莫非齊心基金又想為梁粉媒體製造多次「獨家報道」機會？八方打聽過，唔少建制派立法會議員，都冇獲邀出席呢個活動，相信只有真正「梁粉」，當日先有幸獲邀出席。
除咗梁粉組織喺梁振英離開前搞大龍鳳，立會下周五亦會按傳統為梁搞「歡送午宴」，據知民主派立會議員已決定集體杯葛，即使現身都只諗住去抗議。即使建制派陣營，據知亦非人人報名，盡顯梁振英冇朋友本色。至於梁則會喺本月23日，喺佢即將要遷出嘅禮賓府設宴，慰勞同話別一眾官員，據知司局長、副局長同政治助理都有獲邀。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk