英國《每日郵報》話，巴塞隆拿球星美斯將會續約至2021年，周薪加37%，由原先嘅36.5萬鎊，加到去50萬鎊，呢個仲要係除稅後人工。
美斯同巴塞份約到2018年屆滿，雙方一直傾緊新約。據歐洲傳媒講，佢哋已經傾掂數，新約會去到2021年，到時美斯34歲。美斯嘅新約人工會達除稅後50萬鎊周薪，加幅37%。美斯將會取代基斯坦奴朗拿度，成為歐洲球壇最高收入球員。一個星期搵50萬鎊，即係大約504萬港紙。一個星期搵500萬係乜概念？以荃灣新盤海之戀為例，佢哋最平嘅單位折實558.8萬港紙，換言之美斯做一個星期多啲，八日人工就夠買一個海之戀單位。
除咗加人工外，美斯新約嘅違約金會加到去3.5億鎊。曼聯舊年買一個保羅普巴要8,900萬鎊，如果要迫巴塞放走美斯的話，就要用差唔多四個普巴嘅身價先至得。